भोजपुर– भोजपुरको षडानन्द नगरपालिका वडा नं. ६ घ्याम्पे रंगशालामा जारी चौंथो संस्करण खुल्ला पुरुष फुटबल प्रतियोगिताको उपाधी सोमबारे फुटबल क्लबले हासिल गरेको छ । वडा खेलकुद विकास समिति षडानन्द नगरपालिका वडा नं. ६ को आयोजनामा भएको प्रतियोगिताको फाईनल खेलमा षडानन्द नगरपालिका वडा नं. ५ चिउरीबोटेलाई २–० गोलले पराजित गर्दै सोमबारे फुटबल क्लबले उपाधी हासिल गरेको हो ।
खेलको मध्यन्तर पहिलाको खेलमा सोमबारे फुटबल क्लबका बिजु भुजेलले १ गोल गर्दै टिमलाई अग्रता दिलाएको थियो भने मध्यन्तर पछिको खेलमा मिलन लिम्बुले एक गोल गर्दा २–० गोलले उपाधी चुम्न सफल भएको हो । प्रतियोगिताको विजेताले नगद रु. १ लाख प्राप्त गर्ने छन् भने उप–विजेताले नगद रु. ६० हजार पाउने छन् । सेमिफाईनलिष्ट लाजिमपाठ फुटबल क्लब र बुद्ध एयर वीङ्स दुई टिमले नगद रु. २५÷२५ हजार प्राप्त गरेका छन् ।
वडा खेलकुद विकास समिति षडानन्द नगरपालिका वडा नं. ६ को आयोजनामा कार्तिक २ गते देखि सुरु भएको प्रतियोगितामा आज ६ गते सम्पन्न भएको वडा वडा खेलकुद विकास समितिका अध्यक्ष दिपेन्द्र बस्नेतले जानकारी दिए ।
